ஜனாதிபதி மைத்திரிபால சிறிசேனா புதிய பிரதமராக மஹிந்த ராஜ பக்ஷவை நியமித்து ஆரம்பித்து வைத்த அக்டோபர்26 ஆட்சி மாற்றத்தின் பின்னர் மூன்று வாரங்கள் கடந்திருக்கும் நிலையிலும் அந்த ஆட்சியானது நிலைபேறான ஒரு அங்கீகாரத்தை உள்ளூரிலும் சரி சர்வதேச ரீதியாகவும் சரி பெற்றுக்கொள்வதற்கு தவறியுள்ளது.
அக்டோபர் 26 இரவில் இலங்கை அரசியலில் பலவந்தமாகவும் தன்னிச்சையாகவும் மைத்திரிபால சிறிசேனாவால் ஏற்படுத்தப்பட்டிருக்கும் இந்த மாற்றமானது நாட்டில் பல்வேறு குழப்பங்கள் ஏற்படுவதற்கு காரணமாக அமைந்திருக்கின்றது.
அடுத்த ஆண்டுக்கான வரவு செலவுத்திட்டம் பாராளுமன்றில் சமர்ப்பிக்கப்பட்டு அதற்கான விவாதங்கள் நடைபெற வேண்டிய இந்த கால கட்டத்தில் பாராளுமன்றத்தை மூடுவதும் திறப்பதுமாக அரசின் சித்து விளையாட்டுக்கள் காணப்படுகின்றன.
கடந்த அக்டோபர் 26 ஆம் திகதி வெள்ளிக்கிழமை இரவு ஸ்ரீ லங்கா சுதந்திரக்கட்சியினர் கூட்டணி அரசாங்கத்துடனான பிணைப்பினை முறித்துக்கொண்ட நிலையில் ஜனாதிபதி மைத்திரிபால சிறிசேனா எதேச்சதிகாரமாக பாராளுமன்ற உறுப்பினர் மஹிந்த ராஜபக்ஷவை பிரதமராக நியமித்திருந்தார்.
இந்த நகர்வினை சற்றிலும் எதிர்பாத்திருக்காத பிரதமர் ரணில் விக்கிரமசிங்க தானே நாட்டின் சட்ட ரீதியான பிரதமர் என்று கூறி தொடர்ந்தும் பிரதமரின் உத்தியோகபூர்வ வாசஸ்தலத்தில் இருந்து வருகிறார். முன்னர் அவருக்கான பாதுகாப்பினை மிகவும் குறைந்த மட்டத்தில் அரசாங்கம் வழங்கியிருந்தது ஆனால் பின்னர் ஐக்கிய தேசிய கட்சியினரின் கோரிக்கைக்கு அமைவாக பாதுகாப்பு நடவடிக்கைகள் சற்று அதிகரிக்கப்பட்டுள்ளன.
இந்த ஆட்சி மாற்றத்தின் பின்னர் நாட்டின் அரசியல் ஸ்திரத்தன்மை பரவலாக பாதிக்கப்பட்டிருக்கும் நிலையில் அதனை மேலும் தீவிரமடையச்செய்யும் வகையில் ஜனாதிபதியால் பாராளுமன்ற அமர்வுகள் ஒத்திவைக்கப்பட்டன. பின்னர் கடுமையான அழுத்தத்தின் காரணமாக அதற்கு முன்னதாக பாராளுமன்றை கூட்டுவதற்கான நடவடிக்கையை ஜனாதிபதி முன்னெடுக்கலாம் என எதிர்பார்க்கப்பட்டிருந்தாலும் இந்த விடயத்தில் குழப்பமான நிலைப்பாடுகளே காணப்பட்டிருந்தன. சரியான ஒரு திகதி இந்த விடயத்தில் அறிவிக்கப்பட்டிருகவில்லை.
சபாநாயகர் பாராளுமன்றத்தை கூட்டுவதற்கான அதிகாரம் தனக்கு இருப்பதாகக் கூறினார். ஆனால் அதற்கு இடமளிக்கப்போவதில்லையென ஆளும் தரப்பு கடுமையான பிடிவாதத்துடன் காணப்பட்டது. இந்த முரண்பாடுகள் தீவிரமடையும் நிலையில் மைத்திரிபால சிறிசேனா தனது மற்றொரு ஆட்டத்தை காண்பித்திருந்தார். ஆம், ஏற்கனவே அமர்வுகள் ஒத்திவைக்கப்பட்டிருந்த பாராளுமன்றத்தை தான் கலைப்பதாக நவம்பர் ஒன்பதாம் திகதி மற்றொரு வெள்ளிக்கிழமை இரவு திடீர் அறிவிப்பினை விடுத்திருந்தார்.
இந்த அறிவிப்பு ஐக்கிய தேசிய கட்சி தலைமையிலான கட்சிகளுக்கு மட்டுமல்லாமல் ஆளும் கட்சியில் அங்கம் வகிக்கும் ஸ்ரீ லங்கா சுதந்திர கட்சி மற்றும் பொதுஜன பெரமுன ஆகிய கட்சிகளில் அங்கம் வகிக்கும் சகல தரப்பினருக்கும் பெரும் அதிர்ச்சியாக அமைந்திருக்கும் நிலையில் பொதுமக்கள் மத்தியில் மைத்திரி மஹிந்த தரப்பு மிகவும் கடுமையான எதிர்ப்பினை சம்பாதிப்பதற்கு ஏதுவான விடயமாக அது அமைந்து விட்டது.
ஏனென்றால் ஆளும் தரப்பினர் இந்த விடயத்தால் தமது புதிய அமைச்சு பதவிகளை விரைவில் இழக்கும் நிலைக்குத் தள்ளப்பட்டிருந்தனர். அத்துடன் இவர்களின் வாக்குறுதிகளை நம்பி ஐக்கிய தேசிய கட்சியின் வசமிருந்து மற்றைய பக்கம் தாவியவர்களுக்கு இரண்டும் கெட்ட நிலைஏற்பட்டிருந்தது.
ஆனால் இந்தப் பாராளுமன்றம் கலைக்கப்பட்ட விவகாரம் ஐக்கிய தேசிய கட்சியினருக்கும் அவர்கள் சார்ந்த ஏனைய கட்சிகளுக்கும் மக்களின் ஆதரவை மேலும் பெறுவதற்கான ஒரு காரணியாக அமைந்திருந்த அதேவேளை மஹிந்த மைத்திரி தரப்பினர் சபையில் தமது பெரும்பான்மையை நிரூபிப்பதற்கு முடியாத நிலை ஏற்பட்டதன் விளைவாகவே பாராளுமன்றம் கலைக்கப்பட்டது என்பது தான் யதார்த்தம் .
ஏனென்றால் பாராளுமன்றத்தில் மொத்தம் 225 உறுப்பினர்கள். பெரும்பான்மைக்கு 113 இடங்கள் தேவை. ராஜபக்ஷ, சிறிசேனா கூட்டணிக்கு 104 உறுப்பினர்கள் மாத்திரமே அதுவரை கிடைத்துள்ளனர். மேலும் உறுப்பினர்களை தம் வசம் பெற்றுக்கொள்வதற்கு மிகவும் கடுமையான முயற்சிகளை ஆளும் தரப்பு மேற்கொண்டிருந்தும் அதனை பெறமுடியாததன் விளைவாக பாராளுமன்றத்தை கலைத்து புதிய தேர்தல்களை நடாத்துவதற்கான திகதியையும் அறிவித்து விடுகிறார் ஜனாதிபதி.
ஆட்சியை தக்கவைத்துக்கொள்வதற்காக திடீர் நகர்வுகளை மேற்கொன்ட ஜனாதிபதி இங்கு தவறிழைத்துவிடார். அவரது பாராளுமன்றைக் கலைக்கும் அறிவிப்பு அவர்களால் ஆட்சியை தொடர்ந்து தக்கவைக்கத்துக்கொள்ள முடியாது என்பதனை மிகவும் வெளிப்படையாகக் காண்பித்திருந்தது.
இங்கு ஆரம்பிக்கின்றது ஐக்கிய தேசிய கட்சியினரின் இராஜதந்திர நகர்வுகள். பிரதமர் பதவியிலிருந்து ரணில் விக்கிரமசிங்க நீக்கப்பட்டமைக்கு எதிராக இதுவரையில் நீதிமன்றத்தை நாடியிருக்காத ஐக்கிய தேசிய கட்சி இந்த பாராளுமன்றம் கலைக்கப்படும் முடிவுக்கு எதிராக உயர் நீதி மன்றத்தை நாடுவதற்குத் தீர்மானித்திருந்தது.
அத்துடன் இந்த விடயத்தில் நம்மவர்களின், தமிழ் தேசிய கூட்டமைப்பினர் ஐக்கிய தேசிய கட்சியின் பின்னணியுடன் பாராளுமன்றத்தை கலைக்கும் ஜனாதிபதியின் வர்த்தமானி அறிவித்தலுக்கு எதிராக அடிப்படை உரிமை மீறல் மனு ஒன்றினைத் தாக்கல் செய்திருந்தனர். இந்த மனு ஜனாதிபதி சட்டத்தரணி கனக ஈஸ்வரனால் கூட்டமைப்பின் சார்பாக தாக்கல் செய்யப்பட்டிருந்தது. அவருடன் ஜனாதிபதி சட்டத்தரணி எம்.ஏ.சுமந்திரன் மற்றும் சிரேஸ்ட சட்டத்தரணி சுரேன் பெர்னான்டோ , நிரான் அங்கிரெல் ஆகியோர் இணைந்திருந்தனர்.
இதேவேளை ஐக்கியதேசிய கட்சி சார்பாக ஜனாதிபதி சட்டத்தரணி திலக் மாரப்பனவால் அடிப்படை உரிமை மீறல் மனு தாக்கல் செய்யப்பட்டிருந்தது. இவர்களுடன் முஸ்லீம் காங்கிரஸ், அகில இலங்கை மக்கள் காங்கிரஸ், ஜனநாயக மக்கள் முன்னணி, தேர்தல்கள் ஆணைக்குழுவின் ஆணையாளர்களில் ஒருவரான பேராசிரியர் ராஜன் கூல் உட்பட்ட தரப்பினரால் 12 அடிப்படை உரிமை மீறல் மனுக்கள் பாராளுமன்றத்தைக் கலைக்கும் முடிவுக்கு எதிராக தாக்கல் செய்யப்படிருந்தன.
அதேவேளை இந்த மனுக்களுக்கு எதிராக அரசுக்குஆதரவான தரப்பினரால் இடையீட்டு மனுக்கள் தாக்கல் செய்யப்பட்டிருந்தன. ஆக பாராளுமன்றம் கலைப்பு விவகாரம் உயர் பீடமான நீதித்துறையின் கைகளில் ஒப்படைக்கப்பட்டிருந்தது. இந்த நிலையில் மக்கள், அரசியல்தரப்பினர் என சகலரும் உயர் நீதிமன்றின் முடிவுக்காக காத்திருக்கும் நிலையில் இந்த வழக்கினை விசாரணைக்கு எடுத்துக்கொள்வதா இல்லையா என்ற விவாதம் நவம்பர் 12 மற்றும் 13 ஆகிய திகதிகளில் இடம்பெற்றிருந்தது.
பிரதம நீதியரசர் நளின் பெரேரா மற்றும் உயர் நீதிமன்ற நீதியரசர்களான பிரசன்ன ஜயவர்தன, பிரியந்த ஜயவர்தன ஆகியோர் அடங்கிய மூவரமர்வு இந்த மனுவை விசாரணைக்கு எடுத்திருந்தது. 12 ஆம் திகதி திங்கட் கிழமையே இந்த வழக்கினை விசாரணை செய்வதா இல்லையா என்ற முடிவு கிடைக்குமென பரவலாக எதிர்பார்க்கப்பட்டிருந்த நிலையில் அன்றைய தினம் சட்டமா அதிபரின் சமர்ப்பணத்துக்கு நேரம் போதாமை காரணமாக மறு நாள் வரையில் விசாரணைகள் நீடிக்கப்பட்டது.
திங்கட்கிழமை இவ்விடயம் குறித்து ஒரு நீதிமன்ற உத்தரவு கிடைக்கும் என எதிர்பார்த்திருந்த சகல தரப்பினருக்கும் இந்த நீடிப்பு ஒரு ஏமாற்றமாகவே இருந்தது. திங்கட்கிழமை அன்று உயர் நீதிமன்றம் வழமைக்கு மாறான பரபரப்புடன் காணப்பட்டது. ஏனென்றால் அன்றைய தினம் வழங்கப்படவிருக்கும் நீதிமன்ற அறிவிப்பானது வரலாற்று முக்கியத்துவம் வாய்ந்ததாக அமைய விருக்கும் அதேவேளை நாட்டில் காணப்படும் அரசியல் ஸ்தம்பித நிலையை முடிவுக்கு கொண்டுவருவதற்கும் இந்த அறிவிப்பு மிகவும் இன்றியமையாத ஒன்றாக அமைந்திருந்தது.
நூற்றுக்கணக்கான ஊடகவியலாளர்கள் உயர் நீதி மன்ற வளாகத்தில் கூடியிருந்தார்கள். இவர்களுள் பெருமளவில் வெளிநாட்டு ஊடகவியலாளர்களும் காணப்பட்டனர். குறிப்பாக இந்திய ஊடகங்கள் காணப்பட்டிருந்தன. அதேவேளை இரு தரப்பு ஆதரவாளர்களும் நீதி மன்ற வாளாகத்திலும் வெளிப்புறத்திலும் அதிகளவில் காணப்பட்டிருந்ததுடன் பாதுகாப்பு நடவடிக்கைகளும் மிகவும் கூடுதலாக அதிகரிக்கப்பட்டிருந்தது.
இதே வேளை வழக்கு விசாரணைக்கு எடுத்துக்கொள்ளப்படும் உயர் நீதிமன்ற அறையில் கிட்டத்தட்ட 600 இற்கும் மேற்பட்டவர்கள் இருந்திருக்கலாம் . இவர்களில் பெருமளவானவர்கள் சட்டத்தரணிகளாகவே காணப்பட்டனர்.
அத்துடன் கட்சி ஆதரவாளர்கள் சிலர், ஊடகவியலாளர்கள், அமைச்சர்கள் எம்பிக்கள், வெளிநாட்டு தூதுவர்கள், அவதானிகள், சிவில் சமூக ஆர்வலர்கள் எனப் பலதரப்பினராலும் அந்த அறை நிரம்பியிருந்தது. அத்துடன் அங்கு போதிய ஆசனங்கள் காணப்படாதமையினால் 90 வீதமானவர்கள் நின்றவண்ணமே காணப்பட்டனர். மிகவும் நெரிசலாக அங்கு அனவரும் நிற்கவேண்டிய நிலை காணப்பட்டது. மேலிருந்து ஒரு சிறுபொருள் போடப்பட்டால் அது கீழே விழமுடியா நெருக்கம் காணப்பட்டது.
இவ்வாறான நெருக்கடிக்குள் ஒருவாறாக முதல் நாள் அமர்வு முடிவடைந்த நிலையில் அமர்வு அடுத்த நாள் செவ்வாய்கிழமைக்கு ஒத்திவைக்கப்பட்டிருந்த்து. இந்த முடிவினை யாரும் எதிர்பார்த்திருக்காத நிலையில் பாரிய அதிர்ச்சியினைத் தருவதாக இது அமைந்துவிட்டது.
மறு நாள் நீதிமன்ற அமர்வுகள் ஆரம்பமானபோதும் மேலே குறிப்பிட்ட நெருக்கடியான நிலை மேலும் தீவிரமடைந்திருந்தது. ஆனால் வழமைக்கு மாறான பாதுகாப்பு நடவடிக்கைகள் முன்னெடுக்கப்படிருந்தன. அதிகளவான பாதுகாப்பு தரப்பினர் கடமைகளில் ஈடுபடுத்தப்பட்டிருந்தனர். பொதுமக்கள் உயர் நீதிமன்றத்துக்குள் வருவதற்கு கட்டுப்பாடுகள் விதிக்கப்பட்டிருந்தன.
அத்துடன் இடவசதி போதாமை காரணமாக விசாரணைகள் இடம்பெற்ற மன்றின் உட்புறத்துக்கும் அதிகளவானவர்களை உள்வாங்கமுடியவில்லை. பெருமளவானவர்கள் வெளிப்புறங்களில் காணப்பட்டிருந்தனர். அரச மற்றும் எதிர் தரப்பு எம்பிக்கள் பிரசன்னமாகியிருந்தனர். சட்டத்தரணிகள் இவர்களுக்காக கடுமையான வாதங்களில் ஈடுபடும் நிலையில் இந்த இரு தரப்பு எம்பிக்களும் அருகருகில் இருந்தவர்களாகவும் ஒருசிலர் இருப்பதற்கு இடமற்றவர்களாக சகலபந்தாக்களையும் இழந்து நீதிமன்றில் சகலரும் சமம் என்பதனை நிரூபிக்கும் வகையில் நின்றுகொண்டும் இருந்தனர்.
இவ்வாறாக கடும் நெருக்கடிகளுக்கு மத்தியில் செவ்வாய்க்கிழமை காலை 10.00 மணியளவில் விசாரணைகள் ஆரம்பமானதுடன் சட்டமா அதிபரின் சமர்ப்பணத்தை அடுத்து இடையீட்டு மனுதாரர்களின் சமர்ப்பணம் அதனை அடுத்து முறைப்பாட்டாளர்களின் தொகுப்புரை என அன்றைய அமர்வு நீண்டு சென்றது. 10 மணிக்கு ஆரம்பமான அமர்வில் 11.30 மணியளவில் 15 நிமிட ஒத்திவைப்பின் பின்னர் மீண்டும் ஆரம்பமாகியிருந்தது. அதன் பின்னர் அந்த அமர்வு 03.30 மணிவரை சென்றது. அந்த நிலையில் சகலரது சமர்ப்பணங்களும் நிறைவடைந்திருந்த நிலையில் நீதிமன்றின் அறிவிப்பு மாத்திரம் வெளியிட வேண்டிய தேவை காணப்பட்டது.
காலை 10.00 மணி முதல் மாலை 03.30 மணிவரை மிகவும் நெரிசல் மிக்க ஒரு இடமாக அந்த நீதிமன்றம் காணப்பட்டது. பின்னர் 05.00 மணிக்கு மன்று கூடுமென அறிவிக்கப்பட்டிருந்தது. ஆனால் 05.50 மணிக்கே மீண்டும் மன்று கூடியது. இந்த நிலையில் நீதிமன்றம் , இந்த வழக்கினை விசாரணை செய்வதற்கு தீர்மானித்ததுடன் பாராளுமன்றை கலைக்கும் வர்த்தமானி அறிவித்தலை டிசம்பர் 7 ஆம் திகதி வரை இடைநிறுத்தியும் உத்தரவினை பிறப்பித்திருந்தது. அத்துடன் 5 க்கும் மேற்பட்ட நீதிபதிகள் அடங்கிய முழுமையான அமர்வொன்றில் இந்த வழக்கினை விசாரணை செய்யவேண்டுமென மற்றொருமனு நீதிமன்றில் அரசஆதரவு தரப்பினரால் தாக்கல் செய்யப்பட்டுள்ளது.
இந்த நிலையில் சட்டத்தரணி கனக ஈஸ்வரன் தரப்பினரின் வாதமாக ஜனாதிபதி மைத்திரிபால சிறிசேனா தனக்கு வழங்கப்பட்ட அதிகாரங்களை மீறி பாராளுமன்றை கலைத்திருப்பதாகவும் 19 ஆவது திருத்தத்தின் பின்னர் இவ்வாறான ஒரு சூழ்நிலையில் பாராளுமன்றத்தினை அவரால் கலைக்க முடியாதெனவும் தெரிவிக்கப்பட்டதுடன் அரசியலமைப்பின் ஒரு சில தனி அதிகாரங்களை பயன்படுத்தி முடிவினை எடுக்க முடியாதெனவும் அரசியலமைப்பினை தொகுப்பாகவே நோக்கவேண்டுமெனவும் தெரிவிக்கப்பட்டிருந்தது. அத்துடன் அரசியலமைப்பின் சில சரத்துக்களை தேவையற்ற விதத்தில் தொடர்பு படுத்த முடியாதெனவும் அவர்களால் சுட்டிக்காட்டப்பட்டிருந்தது.
இதேவேளை அரச தரப்பினரின் குறிப்பாக சட்டமா அதிபரின் வாதமாக 33/2/சி அரசியலமைப்பு சரத்தின் பிரகாரம் ஜனாதிபதி தனக்கு வழங்கப்பட்டிருக்கும் அதிகாரங்களைப் பயன்படுத்தியே பாராளுமன்றத்தை கலைத்திருக்கும் அதேவேளை இது முழுக்க முழுக்க அரசியலமைப்புக்கு உட்பட்ட விவகாரமாக அமையும் அதே வேளை இந்த விடயங்களை சர்வஜன வாக்கெடுப்பின் மூலம் தான் நிறைவேற்ற வேண்டிய தேவை இல்லை எனவும் கூறப்பட்டது.
தற்போது இந்த இரு தரப்பு வாதங்களின் பின்னர் இந்த வழக்கினை விசாரணை செய்வதற்கு நீதிமன்றம் எடுத்துக்கொண்டமையானது, ஐக்கிய தேசிய கட்சியினை பொறுத்தவரையில் சாத்தியமான ஒரு திருப்பு முனையாக அமைந்துள்ளது. ஏனென்றால் விளிம்பில் நின்ற அவர்களுக்கு இது முக்கிய புள்ளியாகக் கருதப்பட்டதுடன் நீதி தமது பக்கம் இருப்பதாக அவர்களால் கொண்டாடப்பட்ட அதேவேளை இந்த சவால்களில் அவர்களால் வெற்றிகொள்ள முடியும் என்ற உற்சாகம் அவர்கள் மத்தியில் தோன்றியது.
ஜனநாயகம் நிலை நாட்டப்பட்டிருப்பதாகவும் நீதியும் மக்களும் அவர்கள் பக்கம் இருப்பதாகவும் இந்த இடைக்கால உத்தரவினை ஐதேக தம்வசம் சாதகமாக ஆக்கியதுடன் மீண்டும் ஆட்சியை தம்பக்கம் இழுக்கும் நடவடிக்கைகளை மேலும் தீவிரப்படுத்தியிருந்தனர்.
ஐக்கியதேசிய கட்சியினரின் தற்போதைய இந்த நிலைக்கு தமிழ் தேசிய கூட்டமைப்பினரின் வகிபாகம் மிகவும் குறிப்பிடத்தக்களவில் இருந்துள்ளது. தமிழ் தேசிய கூட்டமைப்பினை பிரதி நிதித்துவப்படுத்திய கனக ஈஸ்வரனின் வாதம் இந்த இடைக்கால தீர்வினை அவர்கள் பெறுவதற்கு மிகவும் முக்கியமான பங்களிப்பாக அமைந்துள்ளது.
இந்த விடயத்தில் இன்னொரு விடயத்தினைக் குறிப்பிட்டாக வேன்டிய தேவை உள்ளது . இந்த நீதிமன்ற உத்தரவின் பின்னர் கனக ஈஸ்வரன் மன்றிலிருந்து வெளியே வந்த நிலையில் அவரது காலை வீழ்ந்து வணங்கிய இரு பெரும்பான்மையினத்தை சேர்ந்த சட்டத்தரணிகள் உங்கள் ஒருவரால் நாட்டை காப்பாற்ற முடிந்ததாக கூறியமை சுட்டிக்காட்ட வேண்டிய ஒரு சம்பவமாகக் காணப்படுகிறது.
நீதிமன்ற அறிவிப்பினை ஐக்கிய தேசிய கட்சி தமக்கு கிடைத்திருக்கும் சாதகமான புள்ளியாக்கி தமது அரசியல் காய் நகர்த்தலை ஆரம்பித்துள்ளது. தற்போது வழங்கப்பட்டிருக்கும் நீதிமன்ற உத்தரவானது இந்த வழக்கின் தீர்வல்ல என்ற உண்மையை எத்தனைபேர் அறிந்துள்ளார்கள் ?. டிசம்பர் 7 ஆம் திகதியே இந்த வழக்கின் அடுத்த நிலையை அறிய முடியும்.அதற்கிடையில் ஜனாதிபதியின் முன்னைய வர்த்தமானி அறிவித்தலுக்கு அமைவாக பாராளுமன்ற நடவடிக்கைகள் ஆரம்பிக்கப்பட்டு வரலாறு காணாத வன்முறைகளின் களமாக அது மாறியுள்ளது. ஐக்கிய தேசிய கட்சியினர் வென்ற மூன்றுதடவைகள் நடந்த வாக்கெடுப்பையும் ஜனாதிபதி நிராகரித்துள்ளார்.
ஜனாதிபதி மைத்திரிபால, மஹிந்த ராஜபக்ஷவை பிரதமராக நியமித்துள்ளமை மற்றும் பாராளுமன்றத்தை நான்கரை ஆண்டுகளின் முன்னர் கலைத்தமை ஆகிய செயற்பாடுகள் ஆட்சியை தம்பக்கம் வைத்திருப்பதற்காக மேற்கொள்ளப்படும் ஜனநாயக விரோத செயற்பாடுகளாக வரலாற்றுத்தவறாக விமர்சிக்கப்பட்டுவரும் நிலையில் இந்த வழக்கின் தீர்ப்பும் வரலாற்று முக்கியத்துவம் வாய்ந்ததாகவே இருக்கப்போகிறது.
நன்றி ஞாயிறு தினக்குரல்
